ندوۃ العلماء کے ذمہ داروں نے ابتداء سے ہی صحافت اور علمی رسائل پر توجہ دی،چنانچہ دارالعلوم ندوۃ العلماء کے قیام بعد ابتدائی زمانہ میں ہی الندوہ،الضیاء جیسے بلندپایہ علمی رسالے یہاں سے نکلناشروع ہوئے،جس کی شہرت ملک اور ملک سے باہربھی ہوئی،اس کے بعد مختلف علمی اور دینی رسالے یہاں سے شائع ہوتے رہے،موجودہ وقت میں اردو،ہندی،انگریزی اورعربی چاروں زبانوں میں یہاں رسالے شائع ہورہے ہیں،مثلا تعمیرحیات(پندرہ روزہ، اردو)،سچاراہی (ماہانہ،ہندی)،دی فریگرینس آف ایسٹ (ماہنامہ ،انگریزی )،البعث الاسلامی (ماہنامہ،عربی)اور الرائد (پندرہ روزہ ،عربی)،یہ رسالے عام مسلمانوںکو دین کی باتوں سے واقف کرانے کے مقصد سے شائع کئے جارہے ہیں۔

عرصہ سے اس بات کی ضرورت محسوس ہورہی تھی کہ یہاں سے ایک علمی اور تحقیقی رسالہ شائع کیاجائے جوموجودہ دوقت میں مختلف عصری اداروں سے شائع ہونے والے جرنل کی طرح علمی معیارکے مطابق ہو،اسی ضرورت کے مطابق ندوۃ العلماء کے شعبہ مجلس تحقیقات شرعیہ نے ذمہ داران ندوہ کے مشورہ اور ان کی اجازت کے بعد چھٹے فقہی سیمینارمنعقدہ نومبر ۲۰۲۴ءکے موقع پراس مجلہ کاآغاز کیا۔